जानेवारीचे शेवटचे काही दिवस राहिले आहेत. ह्या वेळची सिएटल भेट आता संपत आली आहे. एकच वीकेंड राहिला आहे. अजून बरेच काही भटकायचे राहिले आहे. पोर्टलंड बघण्याचे राहिले आहे (पोर्टलंड खाली दक्षिणेकडे ओरेगॉन राज्यात आहे, जमले तर ओशो रजनीश यांच्या तेथील कधीकाळी असणाऱ्या आश्रमाच्या भागात जाऊन यायचे होते. Netflix वर त्यांच्या विषयी एक माहितीपट आहे.) हा वीकेंड हवामानाच्या दृष्टीने चांगला असणार होता. सूर्यप्रकाश असणार होता. सिएटल पासून अडीच तीन तासांच्या अंतरावर असणारे लेव्हनवर्थ (Leavenworth) नावाचे डोंगरांच्या कुशीत वसलेले गाव आहे, ते ह्या वीकेंडला जाऊन पाहून यावे म्हणून तेथे गेलो. त्याबद्दल आज लिहितो आहे.
अमेरिकेत डिसेंबर, जानेवारी आणि फेब्रुवारी हे कडाक्याच्या थंडीचे असतात. थंडीचा मौसम असतो. देशात जवळ जवळ सगळी कडे बर्फ पडतो. सिएटल मध्ये बर्फ थोडेफार पडते. लेव्हनवर्थ हे गाव सिएटल पासून ईशान्येला १५० मैल लांब आहे. चोहोबाजूने डोंगर. ह्या थंडीच्या मौसमात तेथे देखील भरपूर बर्फ पडतो. ह्या वेळेस इतका पडला कि स्थानिक सरकारला अमेरिकेच्या सैन्याला पाचारण करावे लागले बर्फ हटवायला, एवढा सात आठ फुट बर्फ पडला होता आणि सगळ्या गावात साचला होता. सगळे चलनवलन थांबले होते.
आम्ही गेलो तेव्हा मस्त सूर्य आकाशात तळपत होता. डोंगरावर आणि शहरात ठिकठिकाणी बर्फ तर होताच. त्यामुळे थंडी देखील होती. लेव्हनवर्थला जाण्याचे प्रमुख आकर्षण म्हणजे ते शहर हे जर्मनीतील एखाद्या गावाप्रमाणे आहे (Bavarian). मी दहा एक वर्षांपूर्वी युरोप भटकंतीच्या वेळी जर्मनीत गेलो होतो. अमेरिकेतील शहरे तशी एकसारखी दिसतात, एकाच छापासारखी. कुठे जा तश्याच प्रकारची दुकाने, घरे, रस्ते, वगैरे. विविधता अशी चटकन दिसत नाही. त्यामुळे तो एक उत्सुकतेचा भाग होता. तसे अमेरिकेत , प्रामुख्याने मोठ्या शहरात, दुसऱ्या कुठल्या तरी देशांतून स्थलांतरित होऊन आलेल्या लोकांच्या छोट्या छोट्या वस्त्या असतात. तेथे गेलो कि त्या त्या देशाचा ‘फील’ येतो. पण लेव्हनवर्थ हे अख्खे गावच वेगळे आहे. तसाच काहीसा अनुभव मला पूर्वी अमेरिकेतील फिलाडेल्फिया शहरात गेलो असता आला होता. त्या शहरापासून जवळच आमिश (Amish) लोकांची वस्ती असलेले एक वेगळेच गाव आहे. त्यांचे जीवन बरेच वेगळे असते, त्याबद्दल पाहायला मिळाले. तसेच सिएटल शहराजवळ अजून एक गाव, Poulsbo नावाचे, आहे जे नॉर्वेच्या स्थलांतरित लोकांनी वसवले आहे. तेथे मी गेलेलो नाही.
सिएटल शहरातून निघून पुढे दोन क्रमांकाच्या हमरस्त्यावर Stevens Pass नावाचा घाटरस्ता येतो. या भागात मी साधारण महिन्याभरापूर्वी , ख्रिसमसच्या आदल्या दिवशी, आलो होतो. येथे Heybrook Lookout नावाचा छोटासा पदभ्रमण करण्यासाठी डोंगररस्ता आहे तेथे गेलो होतो. आणि पुढे Skykomish नावाचे छोटेसे गाव आहे. तेथे जुन्या काळातील (१८९० ते १९७४) Great Northern & Cascade Railway चे स्टेशन होते. सगळा भाग बर्फाखाली गडाला गेला होता. ह्या वेळी आम्ही तसेच पुढे घाटरस्ता पार करून पुढे गेलो आणि लेव्हनवर्थच्या अलीकडे काही मैल Lake Wenatchee नावाच तलाव आहे आणि त्याच नावाचे state park आहे. तेथे आम्ही गेलो. जवळपास अर्धेअधिक तलाव बर्फ झाले होते. सगळीकडे बर्फच बर्फ होते. बर्फात विविध खेळ खेळण्याची व्यवस्था तेथे होती, तसेच तंबू टाकून मुक्काम करण्याची देखील सोय होती. दोन तीन तसे तंबू देखील दिसले. तेथे जवळच एक छोटेसे हॉटेल होते. त्याच्या बाहेर मस्त शेकोटी पेटवून ठेवली होती. मस्त शेकत गरम गरम कॉफी प्यायली.
पुढे मग लेव्हनवर्थ गावात गेलो. अमेरिकेची प्रवासी रेल्वे Amtrak चे स्टेशन आहे. गाव तसे मोठे नाही. पर्यटन येथील प्रमुख उद्योग. त्यातही आजूबाजूच्या डोंगरांवरून हिवाळ्यातील खेळांसाठी प्रसिद्ध. उन्हाळ्यात विविध डोंगररस्त्यांवरून भटकंती साठी देखील प्रसिद्ध. वर्षभर कायम काही काहीना उत्सव होत असतात, पर्यटकांसाठी आकर्षित करण्यासाठी. जर्मन गाव असल्यामुळे त्यांचे आवडते पेय बियर ठिकठिकाणी मिळते, ऑक्टोबर महिन्यात ऑक्टोबरफेस्ट होतो. गावात प्रवेश केल्या केल्या माहोल बदलला. रस्त्यांवर जर्मन नावे दिसू लागली. दुकानांची, हॉटेल्सची नावे देखील जर्मन नावे. अचानक एका चौकात घोडागाडी दिसली! त्यात बसून लोकं सैर करत होते. जवळच बर्फात खेळण्यासाठी सोय केली होती, बरीच मुले तेथे घसरगुंड्यासारखे खेळ खेळत होते. एका कोपऱ्यात मला nutcracker museum अशी पाटी दिसली, पण ते बंड होते. मला ते पहायची खूप इच्छा होती. नुकतेच मी The Nutcracker नावाचे नाटक पाहिले होते. Nutcracker हे जर्मन परंपरेचा भाग आहे.
अमेरिकेत हिवाळ्याच्या दिवसात पर्णहीन वृक्षांवर रोषणाई केलेली दिसते. ती अगदी हिवाळा संपेपर्यंत असते. याचे प्रमुख कारण म्हणजे दिवस छोटा, रात्र मोठी. त्या छोट्या दिवसात देखील सूर्य उगवणे, सूर्यदर्शन होते हे दुरापास्त. हे दिवस त्यामुळे तसे मानसिक खच्चीकरण करणारे असतात. ह्या रोषणाई मनाला थोडीफार उभारी मिळते. ख्रिसमस आणि नूतन वर्षांच्या आसपास तर अशी रोषणाई पुष्कळ ठिकाणी असतेच. लेव्हनवर्थचे हि अशी रोषणाई प्रमुख आकर्षण आहे. अतिशय मनोवेधक रोषणाई आम्हाला पाहायला मिळाली.
शेवटी मग अजून एक आगळे वेगळे आकर्षण म्हणजे रेनडियर (Reindeer) फार्म पाहायला गेलो. आपण सगळ्यांनी ख्रिसमस सणाच्या निमित्ताने रेनडियर बद्दल ऐकले असते, पाहिले असते. रेनडियर ओढत नेत असलेल्या गाडीवर सांताक्लोज बसून फिरतो आहे असे दृश्य पहिले असते. शाळेत असताना एस्किमो लोकांबद्दल शिकताना रेनडियर आणि त्यांच्या जीवनातील त्याचे महत्व याबद्दल वाचले असते.
गावाच्या एका टोकाला हे फार्म वसले आहे. खरे तर रेनडियर हा प्राणी फक्त उत्तर ध्रुवावर आढळतो. पण अमेरिकेत अनेक ठिकाणी लोकांनी खासगी रित्या त्या भागातून रेनडियर आणून त्यांचे संगोपन करत आहेत, काही ठिकाणी छंद म्हणून तर काही ठिकाणी त्याचा व्यावसायिक फायद्यासाठी देखील! तसाच काहीसा प्रकार येथे देखील पाहायला मिळाला. आमच्या सारख्या पर्यटकांना रेनडियर दाखवून त्यातून ते थोडीफार कमाई करतात. फार्म मध्ये २५-३० रेनडियर दिसले, विविध वयोगटाचे, लहान मोठे असे. ते चांगलेच माणासाललेले होते. आम्ही आत गेलो तर त्यांना बिलकुल भीती, भीड नव्हती. अगदी सहज ते आमच्या जवळपास फिरकत होते. हात लाऊन देत होते. आम्हाला रेनडियरन भरवण्यासाठी त्यांचे खाद्य देण्यात आले होते, ते आम्ही आत गेलो आणि अगदी सहजपणे ते रेनडियरन भरवत होतो. मजा आली.
आम्हाला आत सोडण्याच्या आधी १०-१५ मिनिटे आधी फार्मबद्दल, त्यांच्या उपक्रमाबद्दल, रेनडियर प्राण्याबद्दल बरीच मनोरंजक माहिती देण्यात आली. हा सारा उपद्व्याप ते सारे कुटुंबच करत आहे. जगातील अनेक ठिकाणी असे रेनडियर फार्म्स आहेत. मंगोलिया, चीन, युरोप मध्ये देखील आहेत. रेनडियर हे खरे तर त्यांच्या डोक्यावर असलेल्या शिंगांसाठी प्रसिद्ध आहेत. त्यांच्याकडे असे अनेक शिंगे (antlers) होती, ती त्यांनी आम्हाला हाताळू दिली, बरीच वजनदार होती.
अशी हि फार्मची सैर संपल्यानंतर जाताना गरम गरम apple cider, hot chocolate देण्यात आले, त्या थंडीत त्याची लज्जत काही औरच होती.